రాజ్ నిడిమోరుతో సమంత... వైరల్ అవుతున్న కొత్త ఫొటో!

స్టార్ హీరోయిన్ సమంత పెట్టిన ఓ ఇన్స్టాగ్రామ్ పోస్ట్ ఇప్పుడు సోషల్ మీడియాలో హాట్ టాపిక్ గా మారింది. ప్రముఖ దర్శకుడు రాజ్ నిడిమోరుతో కలిసి ఉన్న ఫొటోను ఆమె షేర్ చేయడంతో, వీరిద్దరి మధ్య ఉన్న బంధంపై మరోసారి ఊహాగానాలు మొదలయ్యాయి. అయితే, ఈ ఫొటోకు ఆమె జతచేసిన క్యాప్షన్, రాసిన నోట్ చర్చనీయాంశంగా మారింది.

గత కొంతకాలంగా సమంత, రాజ్ నిడిమోరు మధ్య ప్రేమ వ్యవహారం నడుస్తోందంటూ వార్తలు వస్తున్న విషయం తెలిసిందే. గతంలో వీరిద్దరూ సన్నిహితంగా ఉన్న కొన్ని ఫొటోలు బయటకు రావడం ఈ వదంతులకు మరింత బలం చేకూర్చింది. ఇదే సమయంలో రాజ్ నిడిమోరు భార్య సోషల్ మీడియాలో స్పందించిన తీరు కూడా ఈ ప్రచారానికి ఆజ్యం పోసింది.

ఈ నేపథ్యంలో తాజాగా సమంత షేర్ చేసిన ఫొటో మరోసారి అందరి దృష్టిని ఆకర్షించింది. ఈ ఫొటోకు "కుటుంబం, స్నేహితులతో కలిసి ఉన్నాను" (Surrounded by friends and family) అని సమంత క్యాప్షన్ ఇచ్చారు. దీంతో పాటు తన కెరీర్ ప్రయాణం గురించి ఓ సుదీర్ఘమైన పోస్ట్ రాశారు. "గడిచిన ఏడాదిన్నర కాలంలో నా కెరీర్‌లో అత్యంత సాహసోపేతమైన అడుగులు వేశాను. రిస్క్ తీసుకుంటూ, నా అంతర్ దృష్టిని నమ్ముతూ ప్రయాణంలో ఎన్నో నేర్చుకుంటున్నాను. ఈ రోజు, నేను సాధించిన చిన్న విజయాలను వేడుక చేసుకుంటున్నాను" అని ఆమె పేర్కొన్నారు.

అంతేకాకుండా, "నేను కలిసిన వారిలో అత్యంత ప్రతిభావంతులు, కష్టపడి పనిచేసే నిజాయతీపరులతో పనిచేస్తున్నందుకు చాలా కృతజ్ఞతగా ఉంది. బలమైన నమ్మకంతో ఉన్నాను, ఇది ఆరంభం మాత్రమే" అని సమంత తన పోస్టులో వివరించారు. వదంతులు ఎలా ఉన్నా, సమంత తన పోస్టులో వృత్తిపరమైన విజయాలు, తనకు మద్దతుగా నిలిచిన వారి గురించే ప్రస్తావించడం గమనార్హం. దీంతో ఈ ఫొటోపై నెటిజన్లు రకరకాలుగా స్పందిస్తున్నారు.